ஸஃத் இப்னு அபீவக்காஸ் றழியழ்ழாஹு அன்ஹு
துஆவுக்கு பதிலளிக்கப்பட்டவர்
ஸஃத் இப்னு அபீவக்காஸ் றழியழ்ழாஹு அன்ஹு
- இஸ்லாத்தை ஏற்றுக் கொண்ட முதல் மூன்று நபர்களில் ஒருவர்.
- சுவர்க்கத்தைக் கொண்டு நன்மாராயம் கூறப்பட்ட பத்து பேர்களில் ஒருவர்.
- உமர் இப்னு ஃகத்தாப் றழியழ்ழாஹு அன்ஹு அவர்களால் நியமிக்கப்பட்ட ஷுறா ஜமாஅத் ஆறு நபர்களில் ஒருவர்.
- நபி ஸழ்ழழ்ழாஹு அலைஹி வஸல்லம் அவர்களுக்காக இரவில் கண்விழித்து காவல் காத்தவர்.
- பத்ர் ஸஹாபி
- சிறந்த குதிரை வீரர்.
- அழ்ழாஹ்வின் பாதையில் முதன் முதலில் அம்பெய்தவர்.
- ஈராக்கை வெற்றி கொண்ட தளபதி.
- நபி ஸழ்ழழ்ழாஹு அலைஹிவஸல்லம் அவர்களைத் தொட்டு அதிகமான ஹதீஸ்களை அறிவித்துள்ளார்கள்.
- இவர்களைத் தொட்டும் பிரபல்யமான ஸஹாபாக்களும், தாபிஈன்களும் ஹதீஸ்களை அறிவித்துள்ளனர்.
ஸஃத் இப்னு அபீவக்காஸ் றழியழ்ழாஹு அன்ஹு அவர்களுக்கு இந்தச் சிறப்புகளோடு மேலும் ஒரு பிரத்யேகமான சிறப்பு ஒன்றுள்ளது. அதுதான் "முஸ்தஜாபுத் துஆ"- ஸஃத் இப்னு அபீவக்காஸ் றழியழ்ழாஹு அன்ஹு அவர்கள் துஆக் கேட்டால் அழ்ழாஹ் அவர்களுக்கு உடனடியாக பதிலளித்துவிடுவான். அதற்குக் காரணம் நபி ஸழ்ழழ்ழாஹு அலைஹி வஸல்லம் அவர்கள் ஸஃத் இப்னு அபீவக்காஸ் றழியழ்ழாஹு அன்ஹு அவர்களுக்காக கேட்ட பிரத்யேகமான துஆவாகும்.
ஒரு முறை நபி ஸழ்ழழ்ழாஹு அலைஹி வஸல்லம் அவர்கள், "யா அழ்ழாஹ்! ஸஃத் உன்னிடத்தில் பிரார்த்தித்தால் அவருடைய பிரார்த்தனைக்கு பதிலளிப்பாயாக!" என்று துஆக் கேட்டார்கள்.
[ஸஃத் இப்னு அபீவக்காஸ் றழியழ்ழாஹு அன்ஹு- திர்மிதி/ ஹாகிம்]
இந்த ஹதீஸுக்கு விளக்கமாக முஹத்திஸீன்கள் பின்வரும் இரு சம்பவங்களை எடுத்துரைக்கின்றனர்.
1. கூஃபாவில் அதிகாரியாக இருந்த ஸஃத் இப்னு அபீவக்காஸ் றழியழ்ழாஹு அன்ஹு அவர்கள் மீது கூஃபா வாசிகளில் சிலர் உமர் இப்னு ஃகத்தாப் றழியழ்ழாஹு அன்ஹு அவர்களிடம் புகார் கூறினார்கள். அவர் முறையாகத் தொழுகை நடத்துவதில்லை என்பதும் அவர்களின் புகார்களில் ஒன்றாக இருந்தது.
உடனே உமர் இப்னு ஃகத்தாப் றழியழ்ழாஹு அன்ஹு அவர்கள் அவரை நீக்கிவிட்டு அம்மார் றழியழ்ழாஹு அன்ஹு அவர்களை அதிகாரியாக நியமித்தார்கள். ஸஃத் இப்னு அபீவக்காஸ் றழியழ்ழாஹு அன்ஹு அவர்களை மதீனாவுக்கு வரவழைத்து, 'அபூ இஸ்ஹாக்! நீங்கள் முறையாகத் தொழுகை நடத்துவதில்லை என்று கூஃபா வாசிகளில் சிலர் கூறுகின்றனரே! என்று கேட்டார்கள்.
அதற்கு ஸஃத் இப்னு அபீவக்காஸ் றழியழ்ழாஹு அன்ஹு அவர்கள், 'அழ்ழாஹ்வின் மீது ஆணையாக! நபி ஸழ்ழழ்ழாஹு அலைஹி வஸல்லம் அவர்கள் தொழுது காட்டிய முறைப் படியே தொழுகை நடத்தினேன். அதில் எந்தக் குறையும் வைக்கவில்லை. இஷாவுடைய முதல் இரண்டு ரக்அத்களில் நீண்ட நேரம் ஓதியும் பின் இரண்டு ரக்அத்களில் சுருக்கமாக ஓதியும் தொழுகை நடத்துகிறேன்' என்று பதிலளித்தார்கள். 'உம்மைப் பற்றி நம்முடைய கருத்தும் அதுவே' என்று உமர் இப்னு ஃகத்தாப் றழியழ்ழாஹு அன்ஹு அவர்கள் கூறினார்கள்.
அதன்பின்னர் ஒரு நபரை அல்லது சில நபர்களை ஸஃத் இப்னு அபீவக்காஸ் றழியழ்ழாஹு அன்ஹு அவர்களுடன் கூஃபாவுக்கு அனுப்பி, அன்னாரைப் பற்றிக் கூஃபா வாசிகளிடம் விசாரிக்கச் சொன்னார்கள். விசாரிக்கச் சென்றவர் ஒரு பள்ளிவாசல் விடாமல் அவரைப் பற்றி விசாரித்தபோது அனைவரும் அன்னாரைப் பற்றி நல்ல விதமாகவே கூறினார்கள். 'பனூஅபஸ்' கூட்டத்தாரின் பள்ளி வாசலில் விசாரித்தபோது, அந்தக் கூட்டத்தைச் சேர்ந்த அபூ ஸஃதா எனப்படும் உஸாமா இப்னு கதாதா என்பவர் எழுந்து, 'நீங்கள் விசாரிப்பதால் நான் சொல்கிறேன், 'ஸஃத் அவர்கள் தமது படையிலுள்ளவர்களிடம் எளிமையாக நடப்பதில்லை; பொருட்களை சமமாகப் பங்கிடுவதில்லை; தீர்ப்பு வழங்குவதில் நீதியாக நடப்பதில்லை' என்று புகார் கூறினார்.
இதைக் கேட்ட ஸஃத் இப்னு அபீவக்காஸ் றழியழ்ழாஹு அன்ஹு அவர்கள், 'அழ்ழாஹ்வின் மேல் ஆணையாக! மூன்று பிரார்த்தனைகளை உமக்கெதிராக நான் செய்யப் போகிறேன்' என்று கூறிவிட்டு, 'இறைவா! உன்னுடைய இந்த அடியார் அவரின் புகாரில் பொய்யராகவும், புகழ் விரும்பிப் புகார் கூறுபவராகவும் இருந்தால் அவரின்,
* ஆயுளை அதிகப்படுத்துவாயாக!
* வறுமையையும் அதிகப்படுத்துவாயாக!
* பல சோதனைகளுக்கு ஆளாக்குவாயாக!'
என்று பிரார்த்தனை செய்தார்கள்.
இதன் பிறகு அந்த மனிதரிடம் எவரேனும் நலம் விசாரித்தால் 'சோதனைக்காளான முதுபெரும் வயோதிகனாகி விட்டேன். ஸஃதின் பிரார்த்தனை என் விஷயத்தில் பலித்துவிட்டது' எனக் கூறக் கூடியவராகிவிட்டார்.
ஜாபிர் இப்னு ஸமூரா றழியழ்ழாஹு அன்ஹு அவர்கள் வழியாக இதை அறிவிக்கும் அப்துல் மலிக் இப்னு உமைர், 'அதன் பிறகு நானும் அவரைப் பார்த்திருக்கிறேன்; முதுமையினால் அவரின் புருவங்கள் அவரின் கண்களை மறைத்திருந்தன. பார்வை பறி போனதால் பாதைகளில் நடந்து செல்லும் பெண்களின் மீது மோதிக் கொள்வார்; இந்த நிலையில் அவரை பார்த்திருக்கிறேன்' என்று குறிப்பிட்டார்.
[ஜாபிர் இப்னு ஸமூரா றழியழ்ழாஹு அன்ஹு- ஸஹீஹ் புஃகாரி]
2. ஒரு மனிதர் அலி இப்னு அபூதாலிப் றழியழ்ழாஹு அன்ஹு அவர்களைத் திட்டினார்கள். அப்போது ஸஃத் இப்னு அபீவக்காஸ் றழியழ்ழாஹு அன்ஹு அவர்கள் அந்த மனிதருக்கு சாபமிட்டார்கள். உடனே ஒரு பெண் ஒட்டகம் அல்லது ஆண் ஒட்டகம் வந்து அவரைக் கொன்று விட்டது. உடனே ஸஃத் இப்னு அபீவக்காஸ் றழியழ்ழாஹு அன்ஹு அவர்கள் ஒரு அடிமையை உரிமையிட்டு விட்டு இனிமேல் யாருக்கும் சாபமிடுவதில்லை என்று சத்தியம் செய்தார்கள்.
[ஸஃத் இப்னு அபீவக்காஸ் றழியழ்ழாஹு அன்ஹு- ஹாகிம்]
ஸஃத் இப்னு அபீவக்காஸ்
முஸ்தஜாபுத் துஆ
றழியழ்ழாஹு அன்ஹு!
அஸீம் ழாஹிர்
கொழும்பு
Comments
Post a Comment